Dating app fraud: డేటింగ్ యాప్స్, మ్యాట్రిమోనియల్ సైట్లపై నమ్మకం పెట్టుకునే వారికి షాక్ ఇచ్చే ఘటన ఢిల్లీలో వెలుగులోకి వచ్చింది. పెళ్లి చేసుకుంటానని నమ్మించి, ప్రేమ పేరుతో డబ్బులు దోచుకున్న ఒక వ్యక్తిని ఢిల్లీ పోలీసులు అరెస్ట్ చేశారు. ఈ కేసులో బయటపడిన వివరాలు చూస్తే.. ఇది సాధారణ మోసం కాదు, పక్కా ప్లాన్తో చేసిన పెద్ద నెట్వర్క్ లా కనిపిస్తోంది.
పశ్చిమ బెంగాల్కు చెందిన ఆనంద్ కుమార్ (35) అనే వ్యక్తి.. దేశవ్యాప్తంగా వందలాది మంది మహిళలను టార్గెట్ చేశాడని పోలీసులు చెబుతున్నారు. టిండర్, బంబుల్ వంటి డేటింగ్ యాప్స్తో పాటు మ్యాట్రిమోనియల్ వెబ్సైట్లలో నకిలీ ప్రొఫైల్స్ క్రియేట్ చేసి.. డాక్టర్, లాయర్, ఫిల్మ్ ప్రొడ్యూసర్, బిజినెస్మెన్ అంటూ తనను పరిచయం చేసేవాడు. ముందుగా పరిచయం పెంచుకుని, వారాల తరబడి మాట్లాడి, నమ్మకం గెలుచుకుని.. చివరికి పెళ్లి మాట తీసుకొచ్చి మహిళలను భావోద్వేగంగా బంధించేవాడు. ఆ తర్వాతే అసలు గేమ్ మొదలయ్యేది.
నమ్మకం గెలుచుకుని.. డబ్బు దోచుకున్న ప్లాన్
ఈ కేసు వెలుగులోకి రావడానికి కారణం ఒక మహిళ ఇచ్చిన ఫిర్యాదే. తాను రూ.7 లక్షలు పోగొట్టుకున్నానని పోలీసులను ఆశ్రయించడంతో విచారణ మొదలైంది. సోషల్ మీడియాలో ‘వైభవ్ అరోరా’ పేరుతో పరిచయం అయిన వ్యక్తి, పెళ్లి చేసుకుంటానని చెప్పి నమ్మించి.. తర్వాత మెడికల్ ఎమర్జెన్సీ పేరుతో డబ్బు తీసుకున్నాడని ఆమె తెలిపింది. ఇది ఒక్క కేసే కాదు. పోలీసులు చెబుతున్నదేమిటంటే.. ఇలాంటి విధానంతో సుమారు 500 మందిని టార్గెట్ చేశాడని. మొత్తం రూ.2 కోట్లకు పైగా డబ్బు వసూలు చేసినట్లు అంచనా వేస్తున్నారు.
ఆనంద్ కుమార్ మోసం చేసే విధానం చాలా ప్లాన్తో ఉండేది. మొదట బాధితురాలితో స్నేహం పెంచుకోవడం.. తర్వాత ఆమె కుటుంబంతో మాట్లాడినట్లు నటించడం.. చివరకు పెళ్లి గురించి మాట్లాడి నమ్మకం కలిగించడం. ఈ మొత్తం ప్రక్రియలో ఎక్కడా అనుమానం రాకుండా జాగ్రత్త పడేవాడు. డబ్బు అవసరం ఉందని చెప్పేటప్పుడు కూడా నేరుగా అడగకుండా, మెడికల్ ఎమర్జెన్సీ, బిజినెస్ లాస్ వంటి కారణాలు చెప్పేవాడు. కొందరిని మోడలింగ్ అవకాశాలు ఇప్పిస్తానని కూడా మభ్యపెట్టినట్లు పోలీసులు చెబుతున్నారు.
ఇంకా షాకింగ్ విషయం ఏమిటంటే.. కొంతమంది మహిళలతో సన్నిహితంగా ఉంటూ తీసుకున్న ఫోటోలు, వీడియోలను వాడుకుని బ్లాక్ మెయిల్ కూడా చేసేవాడు. డబ్బు ఇవ్వకపోతే వాటిని సోషల్ మీడియాలో పెడతానని బెదిరించేవాడు. డబ్బు తీసుకున్న తర్వాత వెంటనే ఆ ప్రొఫైల్ డిలీట్ చేసి, ఫోన్ నెంబర్ మార్చేసేవాడు. ఒక బాధితురాలి విషయంలో అయితే.. తాను చనిపోయినట్లు నకిలీ మెసేజ్ పంపించి తప్పించుకోవాలని చూసాడు.
టెక్నాలజీతో పట్టుకున్న పోలీసులు.. బయటపడిన అసలు కథ
ఈ కేసులో ఢిల్లీ పోలీసులు టెక్నికల్ సర్వైలెన్స్ ద్వారా నిందితుడిని ట్రాక్ చేశారు. ఫోన్ నెంబర్లు, లొకేషన్ డేటా ఆధారంగా చివరకు పశ్చిమ బెంగాల్లో అతన్ని అదుపులోకి తీసుకున్నారు. అతని వద్ద నుంచి 4 మొబైల్ ఫోన్లు, 8 సిమ్ కార్డులు, అలాగే బాధితుల డబ్బుతో కొనుగోలు చేసిన బంగారు ఆభరణాలు స్వాధీనం చేసుకున్నారు. ఇవన్నీ చూస్తే అతను ఎంత ప్లాన్తో ఈ మోసాలు చేశాడో అర్థమవుతోంది.
Also Read: https://www.telugunews.co/love-vs-arranged-marriage-which-is-better/
పోలీసుల సమాచారం ప్రకారం.. ఇది అతని మొదటి కేసు కాదు. 2017, 2023లో కూడా ఇలాంటి కేసులు నమోదయ్యాయి. జైలుకు వెళ్లి వచ్చిన తర్వాత కూడా మళ్లీ అదే పని కొనసాగించినట్లు తేలింది. ఇతను చదువుకున్న వ్యక్తి కావడంతో, ఇంగ్లీష్లో అనర్గళంగా మాట్లాడి బాధితులను సులభంగా ఆకర్షించేవాడు. అదే అతని ప్రధాన బలం. ఒకసారి నమ్మకం ఏర్పడితే, తర్వాత డబ్బు తీసుకోవడం అతనికి సులభమయ్యేది.
ఆన్లైన్ పరిచయాలు.. జాగ్రత్త అవసరం
ఈ ఘటన ఒక విషయం స్పష్టంగా చెబుతోంది.. ఆన్లైన్లో పరిచయాలు ఎంత సులభమో, అంతే ప్రమాదకరంగా కూడా మారొచ్చు. డేటింగ్ యాప్స్, మ్యాట్రిమోనియల్ సైట్లలో కొత్తగా పరిచయమయ్యే వ్యక్తులపై పూర్తిగా నమ్మకం పెట్టుకోవడం ప్రమాదకరం. ముఖ్యంగా డబ్బు విషయానికి వస్తే మరింత జాగ్రత్త అవసరం.
పోలీసులు సూచిస్తున్నదేమిటంటే..
వ్యక్తిగతంగా కలవకుండా ఎవరికీ డబ్బు పంపవద్దు
మెడికల్ ఎమర్జెన్సీ పేరుతో అడిగితే వెంటనే అనుమానించండి
నకిలీ ప్రొఫైల్స్పై అప్రమత్తంగా ఉండండి.. ఈ కేసు ఒక వ్యక్తి మోసం మాత్రమే కాదు.. ఆన్లైన్ ప్రపంచంలో పెరుగుతున్న కొత్త ప్రమాదానికి సంకేతం. ప్రేమ, పెళ్లి పేరుతో జరుగుతున్న ఇలాంటి మోసాలు పెరుగుతున్న నేపథ్యంలో.. ప్రతి ఒక్కరూ జాగ్రత్తగా ఉండాల్సిన అవసరం ఉంది.
